На малей вечерни
На Господи воззвах, стихиры на 4.
Глас 1.
Подобен: Небесных чинов:
Безсмертным Успением Божия Матере, ангельский собор радуется. И сия отходящи, во обители вечныя вселяется, и к веселию небесному преходящи, в Божественную радость, и вечное наслаждение.
Жизни вышния желающи, сию оставила еси Богородительнице, Отроковице девства цвете, Христа Рождшая всех Живота, благоговейно предстояше апостольский собор честному Твоему погребению, Богоневестная.
Твоим исходным пением и надгробным, воздух убо освятися, восхождением Твоим Мати Бога Человеколюбца, чудо страшное, Богородице Неискусомужная: темже верно покланяем Ти ся вернии, Богородице Неискусобрачная.
Слава, и ныне, глас 6:
Приидите, всемiрное Успение Всенепорочныя Богородицы празднуем: днесь бо ангели торжествуют честное преставление Божия Матере, и к веселию нас земных призывают, вопити немолчным гласом: радуйся, преставльшаяся от земли, и к небесным обителем пресельшаяся. Радуйся, яже ученический лик облаком легким во едино собравшая, радуйся, Упование и Спасение наше: Тя бо христианский род непрестанно ублажает.
Прокимен дне.
На стиховне стихиры, глас 2:
Подобен: Доме Евфрафов:
Собор ученик, и Божественных апостол, собрася погребсти богоприятное тело единыя Богоматере.
Стих: Воскресни, Господи, в покой Твой, Ты, и Кивот святыни Твоея.
Ты Иже из Нея возсиявый неизреченно, сынолепно дух всечистый руками Твоими приими Богородицы, Владыко.
Стих: Клятся Господь Давиду истиною, и не отвержется ея.
Егда ко из Тебе Рождшемуся преставилася еси, снидошася на облацех, тело Твое погребсти, Дево, апостоли.
Слава, и ныне:
Двери небесныя возмитеся, зряще дверь Вышняго, идущу со славою к Сыну и Богу.
Тропарь, глас 1:
В Рождестве девство сохранила еси, во Успении мiра не оставила еси, Богородице, преставилася еси к животу, Мати сущи Живота: и молитвами Твоими избавляеши от смерти душы наша.
Ектениа малая, и отпуст.
На велицей вечерни.
Поем Блажен муж: 1-й антифон.
На Господи, воззвах: ставим стихов 8. И поем стихиры, глас 1.
Самоподобны.
О, дивное чудо, источник жизни во гробе полагается, и лествица к Небеси гроб бывает: веселися Гефсимание, Богородичен святый доме, возопиим вернии, Гавриила имуще чиноначальника: Благодатная, радуйся, с Тобою Господь, подаяй мiрови Тобою велию милость. Трижды.
Дивны Твоя тайны, Богородице, Вышняго Престол явилася еси, Владычице, и от земли к Небеси преставилася еси днесь. Слава Твоя боголепная, богоподобными сияющи чудесы. Девы с Материю Царевою на высоту вознеситеся. Благодатная, радуйся, с Тобою Господь, подаяй мiрови Тобою велию милость. Трижды.
Твое славят Успение, Власти и Начала, Престоли и Господства, Силы и Херувими, и страшнии Серафими: радуются земнороднии, о Божественней Твоей славе красящеся. Припадают царие со Архангелы и Ангелы и воспевают: Благодатная, радуйся, с Тобою Господь, подаяй мiрови Тобою велию милость. Дважды.
Слава, и ныне, глас тойже.
Богоначальным мановением, отвсюду богоноснии апостоли облаки высоце взимаеми, дошедше Пречистаго и живоначальнаго Твоего тела, любезно лобызаху. Превышния же Небесныя силы, со своим Владыкою пришедше, Богоприятное и Пречистое тело предсылающе, ужасом одержими: прекрасно же предъидяху, и невидимо вопияху превышним чиноначалием: се Всецарица Богоотроковица прииде. Возмите врата и Сию премiрно подъимите, Присносущнаго Матерь Света: Тоя бо ради всеродное человеком спасение бысть, на Нюже взирати не можем, и Той достойную честь воздати немощно: Тоя бо преизящное преходит всяк ум. Темже, Пречистая Богородице, присно с Живоносным Царем и Рождеством живущи, молися выну сохранити и спасти от всякаго прилога противнаго новы люди Твоя: Твое бо предстательсво стяжахом, во веки светоявленно блажащи.
Вход. Прокимен дне. И чтения три.
На литии стихиры самогласны, глас 1:
Подобаше самовидцем Слова и слугам, и еже по плоти Матере Его успение видети, конечное елико на Ней таинство: яко да не токмо еже от земли Спасово восхождение узрят, но и Рождшия Его преставлению свидетельствуют. Темже отвсюду Божественною силою собравшеся, Сиона достигоша, и на небо идущую предсылаху Вышшую херувим: Ейже и мы с ними покланяемся, яко молящейся о душах наших.
Глас 2: [Анатолиево:] Яже небес вышшая сущи, и херувим славнейшая, и всея твари честнейшая, яже премногия ради чистоты, Присносущаго Существа приятелище бывши, в Сыновне руце днесь всесвятую предает душу, и с Нею исполняются всяческая радости, и нам дарует велию милость.
[Иоанново:] Всенепорочная Невеста, и Мати благоволения Отча, яже Богу пронареченная во Свое Ему жилище неслитнаго соединения, днесь пречистую душу Творцу и Богу предает: Юже безплотных силы боголепно подъемлют, и к животу преставляется сущая Мати Живота, свеща неприступнаго Света, Спасение верных, и упование душ наших.
Глас 3: [Германово:] Приидите, вси концы земнии, честное преставление Богоматере восхвалим, в руце бо Сына душу непорочную положи. Темже святым Успением ея мiр оживотворися: во псалмех и пениих и песнех духовных, со безплотными и апостолы празднует светло.
Слава, глас 5: [Феофаново:]
Приидите празднолюбных собор, приидите и лик составим, приидите, венчаим песньми Церковь, упокоением Ковчега Божия, днесь бо небо простирает недра, приемля Рождшую всеми Невместимаго: и земля источник жизни, отдающи благословение, украшается благолепием. Ангели лик составляют со апостолы, ужасно взирающе, от живота в живот преставляему, Рождшую Начальника жизни. Вси поклонимся Ей молящеся: сродна присвоения не забуди Владычице, верно празднующих всесвятое Твое Успение.
И ныне, глас тойже:
Воспойте людие Матери Бога нашего, воспойте: днесь бо всесветлую душу Свою в пречистыя длани, иже из Нея воплощшагося без семене предает: егоже и молит непрестанно, даровати вселенней мир, и велию милость.
На стиховне, стихиры самогласны, глас 4.
Приидите, воспоим, людие, Пресвятую Деву Чистую, из Неяже неизреченно пройде, воплощшееся Слово Отчее, зовуще и глаголюще: благословена Ты в женах: блаженно чрево, вместившее Христа: Того святым рукам душу предавши, молися, Пречистая, спастися душам нашым.
Стих: Воскресни, Господи, в покой Твой, Ты, и Кивот святыни Твоея.
Давидскую песнь, днесь, людие, воспоим Христу Богу: приведутся, рече, девы в след Ея, и искренния Ея приведутся в веселии и радовании: ибо от семени Давидова, Еяже ради мы обожихомся, в руце Своего Сына и Владыки, славно и паче слова прелагается. Юже яко Матерь Божию воспевающе, вопием и глаголем: спаси нас, исповедающих Тя Богородицу, от всякаго обстояния, и избави от бед души наша.
Стих: Клятся Господь Давиду истиною и не отвержется ея.
Всечестное Твое Успение, Пресвятая Дево Чистая, ангел множество на Небеси, и человеческий род на земли ублажаем, яко Мати была еси Творца всех Бога: Того молящи не престай о нас, молимся, иже на Тя по Бозе упование положших, Богородице Всепетая и Неискусобрачная.
Слава, и ныне, глас тойже.
Егда изшла еси, Богородице Дево, ко из Тебе Рождшемуся неизреченно, бяше Иаков брат Божий и первый священноначальник, Петр же, честнейший верховник: богословов начальник, и весь Божественный апостольский лик, явленным Богоявлением песнословяще Божественное и страшное Христа Бога смотрения таинство, и живоначальное и богоприятное Твое тело погребше, радовахуся, Всепетая. Превыше же пресвятыя и старейшия ангельския силы, чудеся дивящеся, приникше друг ко другу глаголаху: возмите ваша врата, и восприимите Рождшую небесе и земли Творца: славословеньми же воспоим честное и святое тело, вместившее всеми Невместимаго и Господа. Темже и мы, память Твою празднующе, вопием Ти, Препетая: Христианский рог вознеси, и спаси души наша.
На благословении хлебов тропарь, глас 1, писан на малей вечерни.
На утрени.
На Бог Господь:
Тропарь праздника, трижды.
По 1-м стихословии седален, глас 1.
Подобен:
Всечестный лик премудрых апостол собрася чудно, погребсти славно тело Твое Пречистое, Богородице Всепетая: с нимиже воспеша и ангел множества, преставление Твое честно хваляще, еже верою празднуем.
Слава и ныне, тойже.
И чтение.
По 2-м стихословии седален, глас 3.
Подобен: Красоте девства:
В Рождестве Твоем безсеменное зачатие: во Успении Твоем мертвость нетленная, чудо в чудеси сугубо стечеся, Боородице: како бо неискусомужная, младопитательница чиста сущи? Како же Мати Богу мертвоносна мvроухающи? Темже со ангелом вопием Ти: радуйся, Благодатная.
Слава, и ныне, тойже.
По полиелеи седален, глас 4.
Подобен: Удивися Иосиф:
Возопий, Давиде, что сей праздник, егоже воспел еси древле в книзе псаломстей? Яко Дщерь Богоотроковицу и Деву, преложи Ю на оны обители Христос, Иже из Нея без семене рождся, и сего ради радуются матери и дщери, и невесты Христовы, вопиюще: радуйся, преставившаяся к Вышнему Царствию.
Слава, и ныне, тойже.
Прокимен, глас 4: Помяну имя Твое во всяком роде и роде.
Стих: Слыши, Дщи, и виждь, и приклони ухо Твое.
Всякое дыхание да хвалит Господа.
Евангелие Луки, зачало 4.
По 50-м псалме, стихира, глас 6.
Византиево:
Егда преставление пречистаго Твоего тела готовляшеся, тогда ангели обстояще одр, с трепетом зряху Тя: и ови убо взирающе на тело, ужасом одержими бяху, Петр же со слезами вопияше Ти: о Дево, вижду Тя ясно, простерту просту, живота всех, и удивляюся, в Нейже вселися будущия жизни Наслаждение. Но, о Пречистая, молися прилежно Сыну и Богу Твоему, спастися стаду Твоему невредиму.
Канона два: кир Космы и кир Иоанна. Ирмосы обоих канонов по дважды: тропари же на 12. Катавасиа, кийждо лик свой ирмос.
Канон первый, егоже краегранесие: Да торжествуют богомудрии.
Глас 1.
Песнь 1.
Ирмос: Преукрашенная Божественною славою, священная и славная, Дево, память Твоя, вся собра к веселию верныя, начичнающей Мариаме, с лики и тимпаны Твоему поющия Единородному: славно яко прославися.
Да провождают невещественные чинове, небошественное в Сион Божественное тело Твое, внезапу же стекшеся апостол множество от конец, Богородице, Тебе предсташа абие: с ними же, Чистая, Твою честную, Дево, память славим.
Победныя почести взяла еси на естество, Чистая, Бога рождши: обаче же подобящися Творцу Твоему и Сыну, паче естества повинуешися естественным законом: темже умерши, с Сыном востаеши вечнующи.
Другий канон Иоанна Дамаскина, глас 4.
Песнь 1.
Ирмос: Отверзу уста моя:
Девы отроковицы, с Мариамиею пророчицею песнь исходную ныне воскликните: Дево бо и Едина Богомати ко приятию Небесному преставляется.
Достойно, яко одушевленное Тя Небо, прияша Небесная, Пречистая, Божественная селения, и предста, светло украшена, яко Невеста, Всенепорочная, Царю и Богу.
Песнь 3.
Ирмос: Содетельная и содержительная всех Божия Мудрость и Сило, непреклонну, недвижиму Церковь утверди, Христе: Един бо еси Свят, во святых почиваяй.
Жену Тя мертвену, но паче естества и Матерь Божию, видевше, Всенепорочная, славнии апостоли, ужасно прикасахуся руками, славою облистающей, яко Богоприятное Селение видяще.
Постиже руце досадительныя дерзаго, усечением суд нанес, Богу сохраншу честь, одушевленному Кивоту, славою Божества, в Немже Слово плоть бысть.
Ин.
Ирмос: Твоя песнословцы:
От мертвых чресл произведшися, естеством подобна, Чистая, исхождение разреши, рождши же сущую Жизнь, к Жизни преставися Божественней и Ипостасней.
Лик Богословов от конец, свыше же Ангел множества к Сиону идяху всесильным мановением, достодолжно, Владычице, Твоему погребению служаще.
Ипакои, глас 8.
Блажим Тя вси роди, Богородице Дево в Тя бо Невместимый Христос Бог наш вместитися благоволи. Блажени есмы и мы, предстательство Тя имуще: день бо и нощь молишися о нас и роди христианстии Твоими молитвами утверждаются. Тем, воспевающе, вопием Ти: радуйся, Благодатная, Господь с Тобою.
Песнь 4.
Ирмос: Речи пророков и гадания, воплощение проявиша от Девы Твое, Христе: сияние блистания Твоего во свет языков изыдет, и возгласит Тебе бездна с веселием: силе Твоей слава, Человеколюбче.
Видите, людие, и чудитеся, гора бо Святая и явственная Богу, в Небесныя обители превыше вземлется, Небе земное в Небесное и нетленное селение вселяемо.
Жизни присносущныя и лучшия смерть Твоя бысть прехождение, Чистая, от привременныя к Божественней воистинну и непреходимей, преставляя Тя, Чистая, в веселии Сына зрети Твоего и Господа.
Взяшася двери Небесныя, и Ангели воспеша: и прият Христос Девства Своея Матере сосуд: херувими подъяша Тя с веселием, серафими же славят радующеся.
Ин.
Ирмос: Неизследный Божий Совет:
Чудо бяше зрети Небо всех Царя одушевленное, испражнения преходяще земная, яко чудна дела Твоя! Слава силе Твоей, Господи.
Аще и непостижимый Сея Плод, Имже небеса быша, погребение прият волею, яко мертв, како погребения отвержется неискусобрачно Рождшая?
В преставлении Твоем, Мати Божия, пространнейшее тело Твое и Богоприятное ангельская воинства священными крилы трепетом и радостию покрываху.
Песнь 5.
Ирмос: Божию и неизреченную доброту добродетелей Твоих, Христе, исповем: от Присносущныя бо Славы, Соприсносущное и Ипостасное возсиявый Сияние, из Девственныя утробы, сущим во тьме и сени, воплощься, возсиял еси Солнце.
Яко на облаце, Дево, апостольский лик носимь, к Сиону от конец, служити Тебе, Облаку легкому собрашеся: от Неяже Вышний Бог, сущим во тьме и сени, Праведное возсия Солнце.
Труб богоприятнии языцы богословных мужей, богогласнейше Богородице вопияху, исходную возглашающе песнь Духом: радуйся, Нетленный Источник, Божия Живоначальнаго и спасительнаго всем Воплощения.
Ин.
Ирмос: Ужасошася всяческая:
Да возгласят трубы богословов днесь, язык же многовещанный человеческий ныне да восхвалит, да огласит же воздух, безмерным сияя светом, Ангели да поют Пречистыя Девы Успение.
Сосуд подобаше избранный, пением Ти весь удивляемь, Девице, исходен, весь освящен Богови, всем богоприятен, и сей истино являемый, Богородице Всепетая.
Песнь 6.
Ирмос: Морский пучинородный китов внутренний огнь, тридневнаго Твоего прогребения проображение, егоже Иона пророк показася, спасен бо, яко и предпослася, неврежден вопияше: пожру Ти со гласом хваления, Господи.
Дает Тебе, Яже превыше естества, Царь всех Бог: в Рождестве бо Деву якоже сохрани, тако во гробе тело соблюде нетленно, и спрослави Божественным преставлением, честь Тебе яко Сын Матере даруя.
Воистинну Тя, яко светел свещник невещественнаго Света, кадильницу златую Божественнаго угля, во святая святых всели, ручку и жезл, скрижаль Богописанную, Ковчег святый, трапезу Слова жизни, Дево, Рождество Твое.
Ин.
Ирмос: Божественное сие:
Из Тебе Жизнь возсия, ключи девства не рушивши: како убо пречистое и живоначальное Твое тело искушения смерти бысть причастно?
Жизни бывши храм, жизнь присносущную улучила еси: смертию бо к животу преминула еси, Яже Жизнь рождши Воипостасную.
Кондак, глас 2:
В молитвах Неусыпающую Богородицу, и в предстательствах непреложное Упование гроб и умерщвление не удержаста: якоже бо Живота Матерь к животу престави во утробу Вселивыйся приснодевственную.
Икос: Огради моя помышления, Христе мой: ибо Стену мира воспети дерзаю, Чистую Матерь Твою: на столпе глагол укрепи мя, и в тяжких мыслех заступи мя: Ты бо взывающих и просящих верою моления исполняеши. Ты мне убо даруй язык приносен и помысл непостыден: всяко бо даяние сияния от Тебе низпосылается, Светоподателю, во утробу вселивыйся Приснодевственную.
Песнь 7.
Ирмос: Безстудней ярости же и огню, Божественное желание сопротивляяся, огнь убо орошаше, ярости же смеяшеся, Богодохновенною словесною преподобных тривещанною цевницею, противовещая мусикийским органом посреде пламене: препрославленный отцев и наш Боже, благословен еси.
Богоделанныя скрижали Моисей, писанныя Божественным Духом, яростию сокруш: но сего Владыка, Рождшую неврежденну в Небесныя сохрань домы, ныне внутрь всели: с Нею играюще вопием Христу: препрославленный отцев и наш Боже, благословен еси.
В кимвалех усты чистыми, мусикийски же сердцем светлым, доброгласною трубою, высокою мыслию, Девы и Чистыя в нарочитый избранный день преставления, детельнымим плещуще руками, вопием: препрославленный отцев и наш Боже, благословен еси.
Богомудрии соберитеся людие: Божия бо славы Селение, от Сиона преставляется к Небесному жилищу, идеже глас чист празднующих, глас несказаннаго радования, и в веселии вопиющих Христу: препрославленный отцев и наш, Боже, благословен еси.
Ин.
Ирмос: Не послужиша твари:
Юноши и девы, Девыя же и Богоматере память чтуще, старцы и монаси, царие и судии, пойте: отец наших Господи и Боже, благословен еси.
Да вострубят трубою духовною горы Небесныя, да радуются холми, и да играют Божественнии апостоли: Царица к Сыну преставляется, с Ним царствующи.
Всесвященное преставление Божественныя Твоея и Нетленныя Матере, премiрныя Вышних сил совокупи чины, веселитися с сущими на земли, Тебе поющими: Боже, благословен еси.
Песнь 8.
Ирмос: Пламень орошающь преподобныя, злочестивыя же попаляющ, ангел Божий всемощный, показа отроком, Живоначальный же источник содела Богородицу, тлю смерти, и живот точащу поющым: Содетеля Единаго поим избавлении, и превозносим во вся веки.
Глаголы последоваху Божественному Ковчегу священному, все множество богословов в Сионе: камо идеши ныне, Скиние, зовуще, Бога Живаго: не престай призирающи верою поющия: Содетеля Единаго поим избавлении, и превозносим во вся веки.
Якоже воздевши руце, исходиши, Всенепорочная, руце, имиже Бога носила еси плотию, со дерзновением, яко Мати, рекла еси к Рожденному: яже Ми дал еси, во веки сохрани, вопиющия Тебе: Содетеля единаго поим избавлении, и превозносим во вся веки.
Ин.
Ирмос: Отроки благочестивыя:
Память Твою, Чистая Дево, Начала же, и Власти, и Силы, Ангели, Архангели, Престоли, Господьства, Херувими славят и страшнии Серафими; человеческий же род, поем и превозносим во вся веки.
Иже странно вселивыйся, Богородице, в чистое чрево Твое, воплощаемь, Сей, всесвященый дух Твой прием, у Себе упокои, яко должник Сын. Темже Тя поем, Дево, и превозносим во вся веки.
На 9 песни Честнейшую: не поем, но поем припевы праздника: Роди вси, блажим Тя, Едину Богородицу. Или: Ангели, Успение Пречистыя видевше, удивишася, како Девая восходит от земли на Небо. Таже ирмос: Побеждаются естества уставы: И второй лик тойже припев и ирмос. И на каждый тропарь поют тойже припев по единожды.
Песнь 9.
Ирмос: Побеждаются естества уставы, в Тебе, Дево Чистая: девствует бо Рождество, и живот предобручает смерть: по Рождестве Дева, и по смерти жива, спасаеши присно, Богородице, наследие Твое.
Дивляхуся, Ангельския силы, в Сионе сматряюще своего Владыку, женскую душу руками носящаго: пречисто бо Рождшей, сынолепно провозглашаше: гряди, Чистая, с Сыном и Богом прославлена буди.
Опрята лик апостольский Богоприятное тело Твое, со страхом зряще, и гласом велиим вещающе: в Небесныя домы к Сыну восходящи, спасаеши присно, Богородице, наследие Твое.
Посем первый лик поет втораго канона припев: Величай, душе моя, от земли на Небо честное преставление Божия Матере. И ирмос: Всяк земнородный: и вторый лик поет тойже припев и ирмос. И на кийждо тропарь поют тойже припев по единожды.
Ин.
Ирмос: Всяк земнородный:
Приидите в Сион, на Божественную и тучную гору Живаго Бога, возрадуемся, Богородицу зряще: к зело бо лучшей и Божественней сени, яко Матерь, Сию во Святая Святых Христос престави.
Приидите, вернии, ко гробу приступим Божия Матере, и обымем, сердцы и устнами, очесы и лицем чисто прикасающеся и почерпающе исцелений независтныя дары от Источника приснотекущаго.
Приими от нас песнь исходную, Мати Живаго Бога, и светоносною Твоею и Божественною осени благодатию, императору — победительная, хритолюбивым людем — мир, оставление — поющим и душам спасение подающе.
Таже оба лика, сошедшеся вкупе, поют перваго канона припев и ирмос: Побеждаются естества уставы: И втораго канона припев и ирмос Всяк земнородный: и поклон.
Светилен:
Подобен: Небо звездами:
Апостоли от конец совокупльшеся зде, в Гефсиманийстей веси погребите тело Мое, и Ты, Сыне и Боже Мой, приими дух Мой. Трижды.
На хвалитех, стихиры на 4, глас 1:
Подобен: Яко добля:
В славном Успении Твоем небеса радуются, и ангельская возрадовашася воинства, вся же земля веселится, песнь Тебе исходную провозглашающи, Матери всем Владычествующаго, Неискусобрачная Пресвятая Дево, Яже род человеческий избавльшая прародительнаго осуждения. Дважды.
От конец стекошася, апостолов лучшии, богоначальным мановением, погребсти Тя: и от земли вземлему Тя к высоте зряще, глас Гавриилов радостию вопияху Тебе: радуйся, носило Божества всего. Радуйся, едина земная с вышними Рождеством Твоим совокупльшая.
Яже Живот рождшая, к жизни преминула еси честным Успением Твоим безсмертней, дориносящым Тя ангелом, началом и силам, апостолом, пророком и всей твари, приемшу же нетленными дланьми Сыну Твоему непорочную душу Твою, Дево Мати Богоневесто.
Слава, и ныне, глас 6:
На безсмертное Твое Успение, Богородице Мати Живота, облацы апостолы по воздуху восхищаху, и по мiру разсеянныя, во единем лице предсташа пречистому Твоему телу, еже и погребсти честно, глас Тебе Гавриилов поюще вопияху: радуйся, Благодатная, Дево Мати Безневестная. Господь с Тобою. С нимиже яко Сына Твоего и Бога нашего моли, спастися душам нашым.
Славословие великое. И отпуст.
И дается елей от кандила Пресвятыя Богородицы. И час первый. И конечный отпуст.
На литургии:
Блаженна, 1-го канона, песнь 3-я, на 4: и 2-го канона, песнь 6-я, на 4.
По входе тропарь праздника. Слава, и ныне, кондак.
Прокимен, песнь Богородицы, глас 3: Величит душа Моя Господа, и возрадовася дух Мой о Бозе Спасе Моем.
Стих: Яко призре на смирение рабы Своея, се бо отныне ублажат Мя вси роди.
Апостол к филипписиом, зачало 240.
Аллилуиа, глас 2: Воскресни, Господи, в покой Твой, Ты, и Кивот святыни Твоея.
Стих: Клятся Господь Давиду истиною, и не отвержется ея.
Евангелие Луки, зачало 54.
Вместо Достойно, поем ирмос: Побеждаются естества уставы: И до отдания.
Причастен: Чашу спасения прииму:
На трапезе утешение братии. Аще ли будет праздникъ сей в среду или в пяток: разрешаем точию на рыбу и вино. Аще ли в понедельник: мiряне разрешают на мясо, и сыры и яица: Монаси же точию на рыбу и вино.
Празднуется убо сей праздник девять дней:
[зри] Вестно убо буди, яко аще случится праздник Успения Пресвятыя Богородицы в неделю, зри всего церковнаго последования вечер и утро на Рождество Пресвятыя Богородицы. Точию катавасиа праздника, ирмосы обоих канонов.